അഞ്ചാലുംമൂട് : പരാതിക്കാരിയായ സ്ത്രിയെ തെരുവുനായ ആക്രമിക്കാൻ ശ്രമിച്ചത് തടഞ്ഞ എസ്.ഐ.ക്കും ഒപ്പമുണ്ടായിരുന്ന സിവിൽ പോലീസ് ഓഫീസർക്കും നായയുടെ ആക്രമണത്തിൽ പരിക്കേറ്റു. അഞ്ചാലുംമൂട് പോലീസ് സ്റ്റേഷൻ എസ്.ഐ. ലഗേഷ്‌കുമാർ, സിവിൽ പോലീസ് ഓഫീസർ സുമേഷ് എന്നിവർക്കാണ് തെരുവുനായയുടെ ആക്രമണത്തിൽ പരിക്കേറ്റത്. തിങ്കളാഴ്ച ഉച്ചയോടെയായിരുന്നു സംഭവം.
തിങ്കളാഴ്ച ഉച്ചയോടെ മറ്റൊരു പരാതിയുമായി സ്റ്റേഷനിലെത്തിയ സ്ത്രീയെ സ്റ്റേഷൻ പരിസരത്ത് നായ ആക്രമിക്കാൻ ശ്രമിച്ചു. ഇത് തടയുന്നതിനിടെയാണ് ഇരുവരെയും നായ കടിച്ചത്‌. ലഗേഷിന്റെ കൈകളിലും സുമേഷിന്റെ വയറ്റിലുമാണ് മുറിവേറ്റത്. സുമേഷിന്റെ യൂണിഫോം കടിച്ചുകീറി. തുടർന്ന് ജില്ലാ ആശുപത്രിയിലെത്തിച്ച്‌ ഇരുവർക്കും പ്രഥമ ചികിത്സ നൽകി. ശേഷം വിദഗ്ദ്ധചികിത്സയ്ക്കായി പാരിപ്പള്ളി മെഡിക്കൽ കോളേജ് ആശുപത്രിയിലേക്ക്‌ കൊണ്ടുപോയി. സ്റ്റേഷൻ പരിസരത്ത് അലഞ്ഞു നടക്കുകയും നായ പിന്നീട് ചാവുകയും ചെയ്തു.
