കൊല്ലത്ത് മദ്യപിച്ച് അപകടകരമായ വിധത്തിൽ വാഹനം ഓടിച്ചയാളെ പോലീസ് പിടികൂടി.

കൊല്ലം : മദ്യലഹരിയിൽ അപകടകരമായ വിധത്തിൽ കൊല്ലം നഗരത്തിലൂടെ ലോറി ഓടിച്ചയാളെ പോലീസ് പിടികൂടി. പള്ളിമുക്ക് സ്വദേശിയായ ലോറി ഡ്രൈവർ നിസാറിനെയാണ് മറ്റ് വാഹനയാത്രക്കാരുടെ സഹായത്തോടെ സിറ്റി ട്രാഫിക് പോലീസ് പിടികൂടിയത്.  കൊല്ലം റെയിൽവേ ഗുഡ്സ് ഷെഡ്ഡിൽ ഓടുന്ന ചരക്കുലോറിയുമായാണ് ഇയാൾ മദ്യലഹരിയിൽ നഗരത്തിൽ എത്തിയത്. കളക്ടറേറ്റ് ഭാഗത്തുനിന്നും അമിതവേഗത്തിൽ വന്ന ലോറി ടി.ബി.ഹോസ്പിറ്റലിനു സമീപത്തെ തൂണിൽ ഇടിച്ചു. ലോറിയുടെ വരവ് കണ്ട് ഇരുചക്രവാഹന യാത്രികർ ഉൾപ്പെടെ ഒഴിഞ്ഞു മാറിയതിനാൽ വൻ അപകടം ഒഴിവായി. 

അതു വഴി കടന്നുപോയ മറ്റു വാഹന യാത്രക്കാർ ചിന്നക്കടയിൽ നിന്ന ട്രാഫിക് പോലീസിനെ വിവരമറിയിച്ചതിനെ തുടർന്ന് ചിന്നക്കട സിഗ്നലിനു സമീപം ലോറി തടഞ്ഞു നിർത്തുകയായിരുന്നു. ലോറിയിൽ ഉണ്ടായിരുന്ന മറ്റൊരാൾ ഓടി രക്ഷപ്പെട്ടു. ലോറി ഡ്രൈവർ നിസാറിനെ പോലീസ് കസ്റ്റഡിയിലെടുക്കുകയും ഇയാളുടെ പേരിൽ പോലീസ് കേസെടുക്കുകയും ചെയ്തു.