ചാത്തന്നൂർ : ബിജെപിയുടെ പൂതക്കുളം പഞ്ചായത്ത് സമിതി പ്രസിഡന്റിനെ വെട്ടി പരിക്കേൽപ്പിച്ചു. ഇന്നലെ രാത്രി ബിജെപിയുടെ ചാത്തന്നൂർ മണ്ഡലം കമ്മറ്റി കഴിഞ്ഞു വീട്ടിലിക്ക് മടങ്ങുന്ന വഴിയാണ് ഒരു സംഘം ഡി.വൈ.എഫ്. ഐ പ്രവർത്തകർ വഴിയിൽ തടഞ്ഞ് നിർത്തി വെട്ടി പരിക്കേൽപ്പിച്ചതെന്ന് ബിജെപിയുടെ പൂതക്കുളം പഞ്ചായത്ത് സമിതി പ്രസിഡന്റ് സുജിത്ത് കുമാർ പറഞ്ഞു.മള്ളൂരാൻ ഗിരീഷ്, നളി കണ്ണൻ, ചന്തു എന്നിവരുടെ നേതൃത്വത്തിലുള്ള എട്ടോളം പേരുൾപ്പെട്ട സംഘമാണ് തന്നെ ആക്രമിച്ചതെന്ന് സുജിത്ത് കുമാർ പറഞ്ഞു. ആക്രമണത്തിൽ പരിക്കേറ്റ സുജിത്ത് കുമാറിനെ മെഡിസൈറ്റി ഹോസ്പിറ്റലിൽ പ്രവേശിപ്പിച്ചു.
ബിജെപി ജയം ഉറപ്പിച്ച ചാത്തന്നൂർ മണ്ഡലത്തിലെ ബിജെപിയുടെ മുന്നേറ്റത്തിൽ വിറളിപൂണ്ട സിപിഎം പ്രവർത്തകർ നിരന്തരമായി ബിജെപി പ്രവർത്തകരെ അക്രമിക്കുകയും, ബിജെപിയുടെ പോസ്റ്ററുകൾ കീറികളയുകയും ചെയ്യുന്നത് പതിവാണ് എന്ന് ബിജെപിയുടെ പൂതക്കുളം പഞ്ചായത്ത് സമിതി ജനറൽ സെക്രട്ടറി ആരോപിച്ചു.
പോലീസിന്റെ അന്വേഷണം ഊർജിതം ആക്കി സുജിത്തിനെ കൊല്ലാനുള്ള ശ്രമത്തിന് പിന്നില്‍ പ്രവര്‍ത്തിച്ച പാര്‍ട്ടി ഉന്നതരെ പിടികൂടാന്‍ പോലീസ് തയ്യാറാകണമെന്ന് ആവശ്യപ്പെട്ട് കൊണ്ട് ഇന്ന് വൈകുന്നേരം 5 മണിക്ക് (മാർച്ച്‌ 19 വെള്ളിയാഴ്ച) ഈഴംവിള ഗ്രൗണ്ടിൽ നിന്നും പ്രതിക്ഷേധ പ്രകടനം നടത്തുമെന്ന് ബിജെപി നേതാക്കൾ അറിയിച്ചു.
